「啲新移民離晒大譜，霸住間公屋唔住，仲濫用司法程序話房署違反基本法同人權？」食晏期間，聽見啲食客好勞嘈。
撰文 : Denise 晴報
事緣有位新來港女士，早前被房署勒令遷出公屋，原因係署方喺四個月內家訪佢廿幾次，次次都無人應門。後來戶主得悉後向房署上訴，最後更要訴諸司法。
嗱，我絕對唔鼓勵濫用公共資源嘅人，但亦唔認同大家將焦點放喺「新移民」身上。
好老實，身邊不少人於讀書年代已申請公屋，現在手持被喻為「無得輸」、月租只係幾百蚊嘅一人單位。但佢哋係咪長期住喺入面？我可以話你知：唔係。
記得昔日佢哋獲派上樓，只係佔長者屋入面一間睡房，要同老人家共用廚廁，好唔習慣，所以會搬返娘家住。有人為免隔籬阿伯向房署露口風，會向鄰居支付「掩口費」。即使後來獲派單人公屋，亦只係當迷你倉；為咗製造「居住痕迹」，會長開冷氣、水喉，浪費社會資源嘅同時，亦都浪費地球資源。
作為文明社會一分子，當然期望大家自律使用公共資源。然而人性自私，明知要自律，卻逃不過私心，拼死抓緊眼前利益，怕將來有個萬一，起碼仲有層公屋。
講到底，人性本來就自私，何須標籤任何人呢？
全文刊於《晴報》。標題經TOPick修改，原題為〈自私何須標籤〉。