范振鋒日前凌晨與人在青龍頭寓所樓下涉打交，兩男拳頭交十數分鐘被警方到場制止，同被拘捕，范振鋒眼、鼻和嘴等臉部多處受傷，如今傷勢未癒已經復工，今晚更到君悅擔任仁濟醫院新一屆董事就職禮司儀。
范振鋒話眼睛微絲血管爆裂，肋骨有啲痛:「可能裂咗都唔奇，都冇去照過，而且係事發一日之後先至痛。有啲醫生朋友話我依家行得走得都算好彩0架喇。」佢又謂其實一路都有安排工作，但佢朋友就擔心有啲job要見樣，范振鋒話的確有啲工作需要延遲，不過電台就繼續返，亦密密為新片開會。
至於「嗰單嘢」搞成點呢？之前有報道話同佢發生衝突嘅男子原來同佢住同一幢樓，依家范振鋒仲想搵屋搬云云。今晚范振鋒就話:「其實都希望大家可以冇事，只係一個誤會，大家都無怨無仇，希望以和為貴啦。」佢又話未搬，但太太李思欣搵緊樓，家人亦表擔心，特別係外母大人。范振鋒話:「有啲男親戚都過嚟住下，有個男人喺屋企會安心啲，大家出入亦小心啲，但呢啲嘢都冇得避，惟有小心啲。」
講到話阿Bob主動幫手、向范家提供新居，且免租三個月，范振鋒話已收到對方WhatsApp，並感謝對方一直關心他，又笑言阿Bob係咁同佢分析邊區好住啲，儼如地產經紀咁樣，又話會去拜下神，祈求平平安安。
